និស្សិតខ្មែរចំនួន១៨នាក់ដែលទទួលបានអាហារូបករណ៍ទៅរៀននៅចិន បានត្រឡប់មកលេងស្រុកកំណើតវិញក្នុងឱកាសសម្រាកវិស្សមកាល

ខេត្តបន្ទាយមានជ័យ៖ នៅព្រឹកថ្ងៃទី៣០ ខែមករា ឆ្នាំ២០២០ និស្សិតខ្មែរចំនួន១៨នាក់ដែលទទួលបានអាហារូបករណ៍ ឯកឧត្តម ស សុខា ទៅសិក្សានៅខេត្តអានហួយ ប្រទេសចិន បានត្រឡប់មកលេងស្រុកកំណើតវិញក្នុងឱកាសសម្រាកវិស្សមកាល ក្នុងនោះនិស្សិតមកពីខេត្តបន្ទាយមានជ័យចំនួន៧នាក់ មកពីខេត្តបាត់ដំបង ចំនួន៥នាក់ និងមកពីខេត្តព្រៃវែង ចំនួន៦នាក់។

ក្នុងឱកាសសម្រាកវិស្សមកាល និស្សិតតែងតែនឹកគ្រួសារហើយត្រលប់មកលេងស្រុកកំណើត ជាមួយគ្នានោះក៏បានការយកចិត្តទុកដាក់ពី ឯកឧត្តម អ៊ុំ រាត្រី អភិបាលខេត្តបន្ទាយមានជ័យ លោកបានរៀបចំឡានរបស់សាលាខេត្ត ទៅទទួលនៅច្រកទ្វារព្រំដែនអន្តរជាតិ ហើយជូនទៅខេត្តរៀងៗខ្លួនបន្តទៀតដែរ ។

គួរបញ្ជាក់ផងដែរថា ក្នុងកំឡុងពេលនិស្សិតទាំងអស់មកដល់ច្រកទ្វារព្រំដែនអន្តរជាតិ ក៏ត្រូវបានធ្វើការពិនិត្យច្បាស់លាស់ បញ្ជាក់ថាពួកគ្មានរោគសញ្ញាអ្វីនោះទេ បើទោះបីជាប្រទេសចិន និងបណ្តាប្រទេសមួយចំនួនទៀត មានការចម្លងដោយសារជំងឺរលាកសួត បង្កដោយវីរុសកូរ៉ូណាប្រភេទថ្មី (nCoV2019) ៕