ប្រទះឃើញសពបុរសម្នាក់ស្លាប់ក្នុងស្រះ សមត្ថកិច្ចជំនាញសន្និដ្ឋានថា ស្រវឹងធ្លាក់ចូលស្រះលង់ស្លាប់

ខេត្តកោះកុង៖ បុរសម្នាក់ត្រូវបានគេប្រទះឃើញស្លាប់ក្នុងស្រះទឹកមួយកន្លែង កាលវេលាម៉ោង០២:៣០នាទីរសៀល នាថ្ងៃទី១០​ ខែ​មីនា​ ឆ្នាំ​២០២០ នៅក្នុងស្រះទឹក​ចំការតាកឿន ស្ថិតក្នុងភូមិទឹកប៉ោង ឃុំបឹងព្រាវ​ ស្រុក​ស្រែ​អំបិល​ ខេត្តកោះកុង ។

ក្រោយកើតហេតុគេឃើញមានកម្លាំង​ជំនាញ នៃអធិការដ្ឋាននគរបាល​ស្រុក​ស្រែ​អំបិល​ សហការ​ជាមួយកម្លាំងពាក់ព័ន្ធ​ និងមន្រ្តីពេទ្យ​បង្អែក​ស្រុក​ស្រែអំបិល បានចុះទៅត្រួតពិនិត្យសាកសពនោះផងដែរ ។

ប្រភពពីភរិយាសពបានឲ្យ​ដឹង​ថា​ ​ជនរងគ្រោះ​ឈ្មោះ ​មាស​ ភាព​ ភេទប្រុស​ ​អាយុ​៣៨ឆ្នាំ មានទីលំនៅចំណុចកើតហេតុខាងលេី (ជាមនុស្សញៀនស្រា)បានផឹកស្រាស្រវឹង​ លុះក្រោយមក​ក៏ប្រទះឃេីញ​អណ្ដែតក្នុង​ទឹក​ស្រះតែម្តង ។

បន្ទាន់ពីសមត្ថកិច្ច និងជំនាញពិនិត្យរួច​ បាន​បញ្ជាក់​ថា​ ជនរងគ្រោះគឺស្លាប់ដោយសារ ផឹកស្រាស្រវឹងធ្លាក់ចូលទឹកស្រះ លង់ស្លាប់ ។

បច្ចុប្បន្ន​ សពជនរងគ្រោះ​បាន​ប្រគល់​ជូន​ភរិយា​ ដើម្បីរៀបចំ​ធ្វើ​បុណ្យ​តាមប្រពៃណី ៕