ឯកឧត្តម ផាន់ ចាន់ធុល អភិបាលខេត្តប៉ៃលិន អញ្ជើញបើកការដ្ឋានជួសជុលផ្លូវក្រួសលាយល្បាយថ្មភ្នំ ប្រវែង៦៣០០ម៉ែត្រ ទទឹង ៥ម៉ែត្រ

ខេត្តប៉ៃលិន៖ ថ្ងៃទី១៩ ខែមករា ឆ្នាំ២០២០ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយ ឯកឧត្តម ចេង ញ៉ាន់ និងឯកឧត្តម ហុក សុផល អភិបាលរងខេត្ត ព្រមទាំងក្រុមការងារ បានអញ្ជើញបើកការដ្ឋានជួសជុលផ្លូវក្រួសលាយល្បាយថ្មភ្នំ ប្រវែង ៦៣០០ម៉ែត្រ ទទឹង ៥ម៉ែត្រ ស្ថិតនៅភូមិអូរសួស្តី សង្កាត់​អូរតាវ៉ៅ ក្រុងប៉ៃលិន ខេត្តប៉ៃលិន ដែលជាជំនួយ​ឥតសំណង​របស់រាជរដ្ឋាភិបាល និងប្រជាជនជប៉ុន តាមរយៈគម្រោងទ្រង់​ទ្រាយតូចសន្តិសុខមនុស្សជាតិ (គូសាណូនិ)។

នៅក្នុងឱកាស​នោះ ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍លើកឡើងថា៖ រាជរដ្ឋាភិបាល​កម្ពុជាក្រោម​ការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គឺបានខិតខំប្រឹង​ប្រែងដោះស្រាយនូវរាល់ការលំបាក និងសំណូមពររបស់​ប្រជាពលរដ្ឋ ព្រមទាំងបានខិតខំកសាងអភិវឌ្ឍន៍​ប្រទេស​ជាតិឱ្យមានការរីកចម្រើនលើគ្រប់វិស័យ ជាពិសេសការ​កសាង​ហេដ្ឋារចនាសម័ន្ធរូបវ័ននានាដូចជា៖ ផ្លូវ ស្ពាន សាលារៀន មន្ទីរពេទ្យ ប្រព័ន្ធធារាសាស្ត្រ ជាដើម។

ឯកឧត្តម​អភិ​បាលខេត្ត បានមានប្រសាសន៍បញ្ជាក់ថា៖ ជាក់ស្តែងការជួសជុលផ្លូវក្រួសលាយល្បាយថ្មភ្នំ ១ខ្សែរនេះ គឺមានតួនាទីជួយសម្រួលបានមួយកម្រឹត ដល់ប្រជាពលរដ្ឋ ក្នុងការធ្វើចរាចរណ៍ ការដឹកជញ្ជូនកសិផល និងការធ្វើដំណើរ​ទៅសិក្សារបស់ក្មួយៗសិស្សានុសិស្សផងដែរ។
ឯកឧត្តម​អភិបាល​ខេត្ត ក៍បានជំរុញដល់អាជ្ញាធរមូលដ្ឋានទាំងអស់ ជាពិសេសមេឃុំ/ចៅសង្កាត់ និងមេភូមិទាំងអស់ ដែលគៀកផ្ទាល់នឹងប្រជាជន ត្រូវខិតខំបំពេញការងាររបស់ខ្លួន​ដោយការទទួលខុសត្រូវខ្ពស់ក្នុងការផ្តល់សេវ៉ាសាធារណៈនានាជូនប្រជាពលរដ្ឋ និងត្រូវខិតខំដោះស្រាយបញ្ហាប្រឈម​នានាដែល​កើតមានឡើងនៅមូលដ្ឋានឱ្យកាន់តែមានប្រសិទ្ធភាពខ្ពស់និងឆាប់រហ័ស។

ឯកឧត្តម ផាន់ ចាន់ធុល បានលើក​ឡើងថា៖ នយោបាយឈ្នះ ឈ្នះ របស់សម្តេចជោ សែន បាននាំមកនូវសន្តិភាព​នៅទូទាំង​ប្រទេស ដូច្នេះសន្តិភាពនេះហើយ គឺបានផ្តល់ឱកាសដល់ប្រជា​ពលរដ្ឋនៅទូទាំងប្រទេសរស់នៅដោយសុខសាន្ត ដោយចូលរួម​អបអរសាទរ និងកំសាន្តសប្បាយនៅក្នុងពិធីបុណ្យតូចធំទាំងអស់ ជាពិសេសបានធ្វើឱ្យប្រទេសជាតិមានការអភិវឌ្ឍរីកចម្រើនលើគ្រប់វិស័យ។

ឆ្លៀតក្នុងឱកាសនោះផងដែរ​ឯកឧត្តម​អភិបាលខេត្ត ក៍បានថ្លែង​អំណរគុណយ៉ាងជ្រាលជ្រៅ ចំពោះរដ្ឋាភិបាល និងប្រជាជនជប៉ុន ដែលជានិច្ចកាល បានផ្តល់ជំនួយយ៉ាងច្រើនសន្ធឹកសន្ធាប់ ក្នុងការ​ចូលរួមចំណែកស្តារ និងអភិវឌ្ឍន៍ប្រទេសកម្ពុជា តាំងពីដើម​ឡើយ​រហូត​ដល់បច្ចុប្បន្ន។

សូមបញ្ជាក់ថា៖ ផ្លូវក្រួសលាយល្បាយថ្មភ្នំ ដែលជាជំនួយឥត​សំណងរបស់រាជរដ្ឋាភិបាល និងប្រជាជនជប៉ុន តាមរយៈ​គម្រោង​ទ្រង់ទ្រាយតូចសន្តិសុខមនុស្សជាតិ (គូសាណូនិ) បានបើកការ​ដ្ឋានជួសជុលនាពេលនេះ គឺមានប្រវែង ៦៣០០ម៉ែត្រ ទទឹង ៥ម៉ែត្រ សំណង់សិល្បការចំនួន ៧កន្លែង និងគ្រឿងបរិក្ខា​រ​ចរាចរណ៍​មួយចំនួនទៀត ដែលមានប្រជាពលរដ្ឋ ចំនួន ៤ភូមិ គឺ​ភូមិអូរសួស្តី ភូមិអូរតាវ៉ៅ ភូមិកូនភ្នំ និងភូមិប៉ាងរលឹម ស្មើនឹង​ប្រជាជន ចំនួន ៦៩៧២នាក់។